2 Chronicles 15
1 上帝个靈降在俄德个孻仔亞撒利雅身上。
2 佢就去見亞撒王，對佢講：「亞撒王㧯所有猶大、便雅憫个人民哪，請聽𠊎講！若係你等順從上主，佢一定會㧯你等共下。你等尋佢，佢就俾你等尋到。你等離開佢，佢就㧒掉你等。
3 以色列已經盡久無真神，無教導个祭司，也無法律。
4 總係災難臨到个時，佢等轉向上主—以色列个上帝；佢等尋求佢，佢就俾佢等尋到。
5 在該期間，出入个人全部無安全，因為逐所在有動亂。
6 這國攻打該國，這城攻打該城，因為上帝使災難痛苦降在佢等身上。
7 總係，你等一定愛堅強，做毋得灰心；你等个工作一定會得到報賞。」
8 亞撒聽到先知俄德个孻仔亞撒利雅个預言，就得到鼓勵。佢將猶大㧯便雅憫全地所有个偶像並佢在以法蓮山區所佔領該兜城个偶像全部除掉；佢又將聖殿庭院肚上主个祭壇整好。
9 盡多以色列人對以法蓮、瑪拿西、西緬來歸順亞撒，住在佢个國中，因為佢等看到上主—佢个上帝㧯佢共下。亞撒召集這兜人㧯猶大、便雅憫个人民；
10 亞撒在位个第十五年三月，佢等就聚集在耶路撒冷。
11 該日，佢等對捉來个戰利品中，用七百隻牛、七千隻羊獻給上主。
12 佢等就立約，愛全心全意尋求上主—佢等祖先个上帝。
13 無論男女老幼，毋尋求上主—以色列上帝个，就愛將佢處死刑。
14 佢等奉上主个名大聲發誓，愛遵守這約；然後佢等歡喜盡嘶，歕喇叭、羊角。
15 猶大所有个人民全部當歡喜；因為佢等全心立約，全意尋求上主，佢就俾佢等尋到，所以上主賜佢等國內太平。
16 亞撒王廢掉厥婆瑪迦太后个名份，因為姖為亞舍拉女神造邪淫个柱像。亞撒將女神像斬斷，打碎，在汲淪溪滣燒掉。
17 雖然亞撒無將以色列所有山岡頂个神廟廢掉，總係佢一生人一心一意對上主忠心。
18 佢將厥爸㧯自家奉獻給上帝个東西，就係金銀㧯用品，全部放在聖殿肚。
19 一直到亞撒在位个第三十五年，這站期間全部無戰爭。